Emaitzak ikusita, 2008an HIRI HISTORIKOEI BURUZKO NAZIOARTEKO KONGRESU handi bat antolatu nahi dugu, gure hiriak eta eskualdeak ondarea kontserbatzeko eta eraberritzeko lanean duen esperientzia aberasteko. Bereziki, hiri historikoaren ezagutzan eta gizarte egituran harresia ardatz gisa azaltzea da asmoa, Gasteizek harresian eta hirigunean egindako lanaren erakusgarri izan dadin, nazioarteko hainbat hiri eta erakunderen elkarlanari esker.

Azken urteetan, Vitoria-Gasteizek, eta oro har Araba osoak, esperientzia aberatsa lortu dute harresia eta ondare fisikoa nahiz ukiezina berreskuratzen, kontserbatzen eta biziberritzen, eta ekintza hauek guztiak ezinbestekoak direla erakutsi dute, herritarrak gizartean eta kulturan batzeko eta arabar gizartearen ekonomia bultzatzeko.

Arabak biziberritze demokratikoan edo ondarearen ezagutza gizarteratzean egun bizi duen unearen erakusgarri dira hauek:

• Vitoria-Gasteizko Erdi Aroko harresiak berreskuratu dira,

• Santa Maria Katedralaren eraberritze irekia,

• Arabarri Elkarteak hirigune historikoak berreskuratzeko egiten duen lana,

• San Vicente edo San Migeleko elizak eta bestelako artelan gotikon proiektuak eta lanak,

• baita Gesaltza Añanako birgaitze publiko bikaina ere,
  guztiak Foru Aldundiaren Ondare Historikoaren Zerbitzuak kudeatuta.

Horregatik guztiagatik, ”HIRI HISTORIKOEI BURUZKO NAZIOARTEKO KONGRESUA /Harresia, hiri historikoa antolatzeko ardatz” topaketak hainbat hiri, unibertsitate eta ondare historiko-artistikoa babesteko erakunderen ordezkari kualifikatuak bilduko ditu Vitoria-Gasteizen, 2008ko azaroaren azken egunetan. Horiek guztiak aitzindariak dira harresiak ikertzeko, babesteko, berreskuratzeko eta errentagarri bihurtzeko lanetan, gizartean, kulturan, hirian, ekonomian... harresiak ezagutzeko eta egituratzeko elementu ezin hobeak baitira, herritarren eta bisitarien hainbat belaunaldiren bizipenak jaso dituzten historia liburu irekiak.

Jardunaldian, hiri historikoen testuinguruan harresiak aztertuko dira, ezagutza-iturri, gizarteratzeko, antolatzeko, dinamizatzeko, birgaitzeko eta erakartzeko elementu gisa, nazioarteko erakunde ospetsuek babes eta balio bereziko jo dituzten elementu bereziak. Horren guztiaren oinarrian praktika da osagai nagusia, harresiak hartzen dituzten inguruetarako erabat errentagarriak izan diren esperientziak oinarri hartuta aukeraturikoa.

Une honetan erabakigarria da nazioarteko topalekuetan antolatzea eta parte hartzea, gure esperientziak eta etorkizuneko asmoak hirigintzan eta ondarean ari diren hiri eta erakundeekin erkatzeko.